Tag Archives: escritores galegos

DÍA DAS LETRAS GALEGAS 2013: ROBERTO VIDAL BOLAÑO

16 May

1366785772939_175_148_A_defaf708dec9d6262965754b2aa65As Bibliotecas Municipais celebramos o Día das Letras Galegas 2013 con programación en cada unha nosas bibliotecas para homenaxear a Roberto Vidal Bolaño.

Selección de obras de Roberto Vidal Bolaño
Ao longo do mes de maio as nosas bibliotecas contarán cunha selección e exposición de material bibliográfico e audiovisual relacionado co dramaturgo Vidal Bolaño: a súa vida e a súa obra.
Como seleccións complementarias: o teatro galego e as obras máis representativas, autores homenaxeados en anos anteriores e unha mostra de obras de teatro infantil na Biblioteca Infantil e Xuvenil.
Todo iso para mirar na biblioteca ou levalo en préstamo.

Sorteo de lote de libros
A Biblioteca Forum Metropolitano sorteará entre os usuarios e usuarias un lote de libros en galego.

Para participar:

  • Do 3 ao 20 de maio entregarase un boleto a cada lector que leve en préstamo 3 documentos en lingua galega.
  • Realizaranse dous sorteos, un na sala infantil e outro na sala de adultos, o luns 20 de maio ás 17.00 h.

Aquí vos deixo un enlace a unha Guía moi completa feita pola Biblioteca de Estudos Locais sobre a obra e a figura do dramaturgo homenaxeado:  Guía de Lectura Roberto Vidal Bolaño

Presentación de “As voces baixas” de Manuel Rivas na Biblioteca Municipal de Estudos Locais

14 Oct

O vindeiro mércores 17 de outubro ás 20:00 h presentarase o libro As voces baixas na Biblioteca Municipal de Estudos Locais. No acto participarán X. L. Méndez Ferrín, Manuel Bragado e o propio Manuel Rivas.

As voces baixas, publicada por Xerais, trátase dunha obra intimista que arrinca da memoria do autor. En palabras de Rivas é a novela da vida, é a vida contando historias, é a memoria das voces baixas da xente que coñecín.

Manuel Rivas naceu na Coruña en 1957 e é autor de obras de enorme éxito como Que me queres, amor? (1996) ou O lápiz do carpinteiro (1999).

Biblioteca Municipal de Estudos Locais – Rúa Durán Loriga, 10-1º, 15003 A Coruña. Teléfono: 981 184 386 – Fax: 981 184 385 – mail: bestudiosl@coruna.es

Día das Letras Galegas 2012 nas Bibliotecas Municipais

14 May
As Bibliotecas Municipais únense á celebración do Día das Letras Galegas con moitas e diversas actividades arredor de Valentín Paz-Andrade.O polifacético escritor Valentín Paz Andrade é o homenaxeado este ano na conmemoración das letras galegas. Arredor desta celebración as Bibliotecas Municipais da Coruña están a desenvolver diversas actividades:

LEO PARA TI

O día 16 de maio a partir das 19.00 h realizarase en todas as bibliotecas municipais un acto de lectura colectiva no que poderás participar inscribíndote dende agora en calquera das bibliotecas municipais.

– Publicación dunha guía de lectura elaborada pola Biblioteca Municipal de Estudos Locais

– Presentación do libro “O enigma dos nove sepulcros” na Btca. Municipal Ágora de María Acosta. (Martes 15 de maio ás 20.00 h)

– Mitos e monstros de Galicia: encontro con Antonio Reigosa na Btca. Municipal Sagrada Familia (16 maio, 19.30 h)

Enmarcado nos actos conmemorativos arredor do Día das Letras Galegas e para clausurar a temporada do Club dos 7 Medos, a Biblioteca Sagrada Familia quere mostrarlle ao público a Galicia máis popular e misteriosa. Da man de Antonio Reigosa, estudoso e divulgador dos mitos e costumes da nosa terra, ofrécenos unha grande oportunidade para coñecer a extensa riqueza do imaxinario popular galego.

– Recital na Btca. Municipal Infantil e Xuvenil (16 de maio, 20.00 h)

Recital de poesía a cargo de María López Pousa e Moises Fernández Álvarez: Jovenessintalento II. que recitarán textos da súa propia colleita ademais doutros autores como Lois Pereiro ou do homenaxeado Paz Andrade. O recital estará acompañado en todo momento con música composta por estes jóvenessintalento e comprobarás que o seu nome artístico non fai xustiza á realidade.

Mostra bibliográfica na Btca. Municipal Sagrada Familia

A Biblioteca Municipal Sagrada Familia dedícalle unha mostra á obra e a traxectoria vital desta personalidade. Ademais de poeta, con obras aínda inéditas como Canto do pobo disperso (1955), foi un prolífico ensaísta económico, pesqueiro e literario. Destacan as súas biografías sobre dous dos seus personaxes favoritos como foron Castelao, ou Joãou Guimarâes Ros. Intensa e relevante tamén foi a súa actividade en defensa e promoción da cultura galega. Ao mesmo tempo, a biblioteca presenta unha nutrida selección de escritores e escritoras do panorama actual da literatura en galego, na que destacan autores como Fran Alonso, Chus Pato, Ramiro Fonte etc. Dende o día 11 de maio ata o día 31 todos os usuarios e usuarias da biblioteca teñen unha cita coa literatura en galego.

– Mostra bibliográfica na Btca. Municipal Fórum Metropolitano

Mostraremos todas as súas facetas: o poeta, o político, empresario; o seu paso polo cárcere, a súa relación coas Irmandades da Fala, os seus amigos (Castelao, Fernández del Riego, Laxeiro, Isaac Díaz Pardo e un longo etc). Todo iso a través dos seus escritos e das súas cartas.

– Mostra bibliográfica na Btca. Municipal Ágora

– Mostra bibliográfica na Btca. Municipal Rosales

Este ano na Biblioteca Municipal Os Rosales recordamos escritores que foron homenaxeados o día 17 de maio, Día das Letras Galegas. Achégate a descubrir as súas obras e goza ademais dunha mostra de libros recentemente chegados á biblioteca de autores galegos. Ademais, por suposto, coñeceremos un pouco máis o homenaxeado deste ano, Valentín Paz Andrade. Se decides pasarte non esquezas deixarnos a túa palabra favorita en galego. Xuntos faremos unha gran nube de palabras recompilando algunhas das palabras máis fermosas que ten a nosa lingua.